Nayi Nadamar Barin Gida Domin In Hadu Da Jaruma Rahama Sadau, Wata Baiwar Allah Ta Magantu

 

NAYI NADAMAR BARIN GIDA DOMIN IN HADU DA JARUMA RAHAMA SADAU

Sunana Fatima, ‘yar shekara goma sha bakwai, na taso a cikin ƙauna da kulawar iyayena. Amma mafarkina na zama jarumar fim ne ya jefa ni cikin mummunan hali da ba zan taɓa mantawa da shi ba.

Tun ina ƙarama, ina kallon fina-finan Hausa, musamman waɗanda Rahama Sadau ke takawa, sai na ji ina so in zama irinta. A zuciyata, na yanke shawarar duk yadda za a yi, sai na hadu da ita. Na san iyayena ba za su yarda da hakan ba, saboda haka na yanke shawarar tserewa daga gida zuwa Kano—inda naji galibin masu harkar fim suke.

FARIN CIKI YA ZAMA TSANANI

Da na isa Kano, babu inda na sani. Duk da haka, zuciyata cike take da bege da fatan zan cimma burina. Ina yawo a unguwar Zoo Road, inda ake yawan samun masu harkar fim, sai wasu samari biyu suka tare ni.

"Sannu da zuwa Kano," ɗaya daga cikinsu ya faɗa da murmushi. "Muna ganin kamar ke ba ‘yar nan ba ce, ko dai kin zo neman harkar fim ne?"

Na ji wani irin farin ciki ya lulluɓe ni. Ba tare da wata fargaba ba, na tabbatar musu da haka. Sai suka ce su ma ‘yan fim ne, kuma sun san yadda za su haɗa ni da jaruma Rahama Sadau.

Ina jin haka, zuciyata ta buga da murna. Ban yi tunanin komai ba, sai godiya da fatan hakan zai zama mafitar da nake nema. Suka ce sai sun kai ni wani gida da ke kusa, inda zan jira har sai sun yi magana da ita.

Na bi su cikin tsantsar rashin sani. Mun shiga wani gida da ya kasance kamar filin duhu a rayuwata. Kafin in ankara, sun rufe ƙofa suka hau kaina.

MUNAFURCI DA AZABA

Na yi ihu, na roƙe su, amma babu wanda ya ji kukana. Sun raunata ni, sun karya min zuciya, sun yi min fyade. Bayan sun gama, suka ce idan na kuskura na gaya wa kowa, za su kashe ni.

Sai da suka barni a cikin ciwo da zubar da hawaye, sannan na samu damar fita daga gidan da kyar. Ina tafiya kamar wacce ba ta san inda take ba, har sai da wani dattijo mai sayar da shayi ya gani, ya tambaye ni ko lafiya. Na kasa magana, sai dai hawaye kawai ke zubowa daga idona.

Ya tausaya min, ya kaini wajen wata mata mai taimakon mata masu irin wannan matsala. Ita ce ta taimaka aka kaini wajen hukuma.

NAYI NADAMA

Yanzu haka, ina kuka da dana sanin abin da na aikata. Nayi nadamar barin gida na domin mafarki mara tabbas. Da ace na saurari iyayena, da ba zan shiga wannan hali ba.

Ga duk wata ‘ya mace da ke da irin wannan tunani, ina roƙonta da kada ta kuskura ta bi hanyar da na bi. Rayuwa ba fim ba ce. Kuma babu wanda zai riƙe ki fiye da iyayenki.

Ku koyi darasi daga kaddarata.

Wannan labarin wata baiwar Allah ne ta turo mana shi akan abunda ya faru da ita mu kuma muka gyara shi.